ابراهيم محمد يكتب: كنت بخلص ورق الجيش بتاعى يقوم المشير يطردنى من الجامع يامصريين؟

ابراهيم محمد يكتب: كنت بخلص ورق الجيش بتاعى يقوم المشير يطردنى من الجامع يامصريين؟ Ouuoo110

انا مش عارف اقول ايه بجد.. انا طول عمرى كان نفسى اشتغل مزيع مش عاوز اخش الجيش

اصل هخش الجيش اعمل ايه يعنى اروح انضربلى طلقتين ويقولوا عليا شهيد واضحك على نفسى

مهو احنا هنموت شهداء اه بس انا مش عاوز اموت شهيد انا احرر الارض وانا واقف زى الاسد عليها

فقولت اشتغل اعلامى اسهل بس المشكله انوا جالى وقت الجيش

.....جالى معاد الجيش

المهم نزلت من بيتى وروحت المنطقه العسكريه ...طبعا مش هقولكوا اسمها ايه احسن يقبضوا عليا ..شغل محترفين هع هع

المهم الاذان اذن عليا فروحت اصلى فى المسجد بتاع المنطقه العسكريه او قريب منها شويه يعنى

وطبعا كالعاده اخد الكوتشى بتاعى جوا الجامع لانى عارف انوا ديما بيتسرق...اصلوا اديسدس

لكن المره دى سيبتوا على باب الجامع من المنظر اللى شفتوا

الاقى واحد قاعد مدينى ضهروا من بعيد وابص على رتبتوا فى الكتب الاقى دى

ابراهيم محمد يكتب: كنت بخلص ورق الجيش بتاعى يقوم المشير يطردنى من الجامع يامصريين؟ 60px-EgyptianArmyInsignia-FieldMarshal.svg

قعدت اقول لنفسى الرتبه دى اسمها ايه اسمها ايه واضرب نفسى على دماغى
قولت اه سنابل ونسر يانهار اسود دا المشير

الايه؟ مشير ايون هو المشير حتى جسموا باين وانا حاسس انى شفتوا قبل كدا
مع ان دى اول مره اشوفوا فى الحقيقه بس شفتوا فى التليفزيون

طبعا كنت يادوب الحق اخد الكوتشى واطلع اجرى تانى

لقيت لواء جاى ورايا بيقوللى خش وعدينا نصلى فدخلت اداموا

والصلاه بدات ....ثم انتهت

فقولت يانهار اسود وانا ببصلوا كدا بقول لنفسى بقى بزمتك يا سياده المشير سايب الرئيس مبارك كدا وعادى يعنى

المهم لقيتوا بيقوللى تعالى انا قلبى وقع فى رجليا

اتارينى من كتر تضارب الاحاسيس جوايا اكتشفت ان كان صوتى عالى وانوا سمعنى

قاللى تعالى فروحتلوا قاللى اقعد هنا وقعدت

ودار بينى وبينه هذا الحوار بما انى اعلامى فلازم اخد منوا معلومات على قد ما اقدر..

المهم رد عليا على اول سؤال اللى قلتوا بصوت عالى وقاللى ... هو الريس نفسو مش متضايق من اللى بيحصل دا

سكتت شويه قلتلوا يا سياده المشير

المشير : نعم

انا : سيادتك ممكن اعرف منك شويه حجات بعيدا عن الاسرار العسكريه ؟

المشير : بس اوعى تنشرها

انا : لا طبعا طبعا مستحيل انشرها ....طبعا انا اول لما اخرج من المسجد هعمل منشورات واوزعها على الشعب المصرى كلوا.كل دا فى سرى طبعا

المشير : اسال عاوز تعرف ايه بس قول بسرعه لان الواحد متضايق ووراه مسؤليات كتير

انا : سياده المشير مش شايف ان انتوا بتستهبلوا كتير فى القرارات اللى مع الثوره ؟

المشير : بنستهبل انا هعديهالك بس علشان انت صغير لسه بس كل القرارات بتدرس قبلها بفتره

انا : ازاى يعنى؟

المشير : يعنى اى قرارا مهما كان بنبقى مجهزينلوا قرارات مسبقه زى مثلا حمايه سفاره اسرائيل وغيرها

انا: اها تمام انا اعرف كل دا لكن ممكن اعرف حضرتك هتشهد بايه يوم 5 الجاى فى قضيه الريس؟

المشير : يا ابنى ما انتوا شويه عيال انتوا عارفين شهادتى من دلوقتى

انا : احنا مين يا سياده المشير انا مليش دعوه بحد وربنا؟

المشير : لا انتوا شويه العيال بتوع اسفين ياريس وشويه العيال اللى فى اماكن تانيه بيقولوا كلام كويس وبيحللوا الموضوعات على مزاجهم بس اغلب كلامهم صح

انا : بجد والله يعنى احنا اغلب كلامنا صح وان الرئيس برئ وكل دا؟

المشير : تبقى عبيط لو تخيلت ان الرئيس ممكن يكون مذنب فى شئ

انا : طيب ما تخرجوه يا سياده المشير ابوس اديكوا ..

المشير : طبعا لا ركز معايا

انا : حاضر

المشير :..عندك اربع محاور... اهالى الشهداء اللى انضحك عليهم واتقالهم ان الريس هو اللى قتل ولادكوا

عندك الثوار اللى كل يوم والتانى يتنططوا وبنحاول نكسبهم فى صفنا

عندك المؤيدين للرئيس اللى كل يوم والتانى يتنططوا وسايبينهم يعملوا اللى يعملوه لكنهم مش مؤثرين

وعندك اسرائيل اللى بتستدرج رجلنا علشان تدخلنا فى حرب احنا الجزء الخسران فيها بكل الطرق

انا : انا تصدق مشكله بردوا يا سياده المشير طيب والحل؟

المشير : الحل ان كل شئ لازم يمشى قانونى علشان لما الرئيس باذن الله يخرج يكون تحت حمايه الجيش وبحكم قانونى

ووقتها الناس الىل كانت بتشك ان الرئيس مذنب هتتاكد انهم انضحك عليهم وان دا حكم محكمه

انا : طيب ياسياده المشير فهمنى والنبى

المشير : افهم بقى .. دلوقتى لو ضربنا فى الثوار واسرائيل ضربت ؟ هنحارب شويه جوا وشويه برا ؟

انا : طبعا لا هتبقى محتاج تسكت اللى جوا؟

المشير : طيب احنا علشان نسكتهم بنحاول ننفذ اغلب طلباتهم لاننا منتظرين لحظه لقاء اسرائيل على الحدود

انا : طيب كمل كمل

المشير :فكان لازم نعمل حاجه صغيره كدا استغلينا طيشهم ورفعنا ضدهم قضايا عسكريه..احكامها تقيله
ووقت ما نعملهم عفوا اهاليهم نفسهم هيخلوهم يبطلوا سياسه ويقولوا كفايه العفو
ووقتها هنضمن تأمين داخلى من الناحيتين

من ناحيه المؤيدين لانهم مبيعملوش حاجه غير انهم بيتنططوا على الفاضى ...رغم ضماننا لبرائه الرئيس

والمعارضين ..او الثوار لضماننا باننا مسكناهم بسلسله من رقبتهم واى حد يتكلم فيهم .. هنقوللوا مش خرجناكم زى الكلاب

انا : فاضل اهالى الشهداء يا سياده المشير؟

المشير : لا متقلقش دول بس الثوار كانوا بيستغلوهم علشان يعملوا دوشه لتنفيذ اراده سياسيه من بعض القوى الحزبيه والجماعيه

انا : الله عليك يا مشير ياجامد يا فاهم كل حاجه انت

انا : طيب والاقتصاد يا سياده المشير مفيش مشاكل سامع كلام مبهدل الدنيا ويقولوا مصر بتضيع والكلام دا

المشير : احتمال فى فتره قريبه اوى نبدا نرجع الحياه زى ما كانت الاول

انا : طيب متشكر اوى يا سياده المشير انا عاوز اقولك انى حزين اوى على الريس بجد

قحط ايده عليا وطبطب عليا وقاللى متزعلش ربنا هيقوموا بالسلامه ان شاء الله

المشير: تعرف انى كنت عاوز اشوفوا بس وضعى السياسى ميسمحليش دلوقتى

انا : عارف يا سياده المشير بس انا عاوز اعرف انتوا بتحبوا الريس ولا بتكرهوه وباقى المتواجدين فى المجلس الاعلى للقوات المسلحه بيحبوه ولا لا سمعنا كلام كتير

المشير: متصدقش حد لو ما فيناش خير للريس مش هيبقالنا خير فى مصر كلها

انا : فبكيت وعينى ترف دمعا ليس ككل الدموع بل كانت الدموع سريعه جداااااا وغزيره جدا وكل ما كان يؤلمنى فيها انها ساخنه وكانها ستحرق عينى

وقلت له فى حرقه ارجوكم خلوا بالكوا على الريس ارجوكوا انتوا بتتحكموا فى تاريخ مصر

المشير : انت كلامك صح بس التاريخ دا بيتصنع لما الناس تحس انها ماشيه مظبوط حتى ولو بالمراوغه ففى الاول والاخر التاريخ منصف للجميع

انا : ايون فعلا يا سياده المشير بس انا عاوز اسالك سؤال اخر سؤال والنبى

المشير: قول ياحبيبى خلصنى

انا : سمعت كلام من ناس فى الجيش بيقول ان بعد ما الجيش يترك السلطه لحكم مدنى وقتها سيادتك هتستقيل؟

المشير : ايون بالضبط هستقيل

انا : تفتكر بقى يا سياده المشير ان مفيش كلب من كلاب الثوار يقدم فيك بلاغ ويخليك تدخل القفص وانت لابس ابيض ويمكن فى نفس القفص اللى فيه سياده الريس؟

المشير : يلا نقوم نصلى العصر احسن بدل ما احبسك

انا : الله اكبر الله اكبر ...يلا نصلى احسن

انا : يانهار ابيض دا انا نسيت معاد التقديم بتاعى فى المنطقه المركزيه

المشير : وحياه ابوك ما هدخلك الجيش لو وقفت على شعر راسك ..اطلع برا ياض

وانا خارج بقى اخدت الكوتشى بتاعى وطلعت اجرى وجيت عند البوابه الحديد اللى ادام الجامع ولزقت فيها

واول لما اتخبطت فيها لقيت نفسى فى مستشفى جمب بيتنا فبقول لابويا فيه ايه؟
قاللى انت فى غيبوبه من يومين لانك اكلت اكل مش كويس تعبت واغمى عليك

وقعدت تحلم كل شويه وتقول يامشير يامشير ..انت اهبل يا ابراهيم مش هتبطل سياسه بقى

ملازم عدد المساهمات : 3 تاريخ التسجيل : 16/08/2011

ههههههههههههههههههههههههههههههه شغل جامد جدا اللة ينور عليك

» ابراهيم محمد يكتب : عشت يوما مع اسماء محفوظ فى بيتى بالمنوفيه
» ابراهيم محمد يكتب : انا اول مواطن مصرى اقابل الرئيس مبارك فى المركز الطبى العالمى بعد جلسه المحاكمه الثانيه
» ايهاب عامر يكتب : تحــــــــــــــــــــــــــــــذير هــــــــــــــام .......لابنــــــــــــــــــــاء مبارك
» ايهاب بهى الدين ابراهيم يكتب:: فضيحة تعرية اخلاق الشعب المصرى !!!!!!!!!!!!
» سعيدمحمد/يكتب التماس لابناء مباااااااااااااااااااااارك من موقع الرئيس محمد حسنى مبااااااارك